Unha vez valoradas as enquisas de satisfacción pasamos a dar resposta ás observacións xurdidas ás do curso 2009/2010 e aproveitamos para lembrar que existe un buzón SQR (suxestións, queixas e reclamacións) no que nos poden facer chegar as súas ao longo de todo o curso.
1.DIRECCIÓN
No tocante ao nivel do alumnado de Educación Infantil cúmprese sobradamente co establecido no currículo desta etapa de ensino non obrigatorio e practicamente todo o alumnado acada as competencias básicas de lectoescritura ao longo do 1º Ciclo de EP qoe é o que está regulamentado.
Á observación de “máis esforzo na dirección do centro” só podemos contestar que facemos todo o que podemos no noso ámbito de competencias pero moitas das demandas están só no noso ámbito de preocupación e non depende de nós resolvelas.
Ademáis se intentamos resolvelas corremos o risco de que se nos acuse de “utilizar aos nosos fillos, as instalacións, os mestres para facer política” e se nos bote en cara que non respectamos as ideas dos demais e facemos adotrinamento e propaganda.
A contratación de persoal tanto docente como non docente non depende da direción, é a Consellería de Educación quen determina os postos de traballo.
2.PROFESORADO
A única observación neste apartado fai referencia á dificultade para contactar co titor e co profesorado, supoñemos que será un caso aillado porque tanto os titores como o resto do profesorado ofrecen dentro do seu horario como mínimo unha hora semanal para atención aos pais e nais e ao inicio do curso comunícase as familias ese horario . No caso de indicar as familias dificultades para adaptárense a esas horas hai unha flexibilidade absoluta para poder manter eses contactos que consideramos fundamentais para o desenvolvemento da educación do noso alumnado.
3.INSTALACIÓNS
Este apartado supuxo no presente curso unha parte moi importante dos nosos esforzos. O investimento de case 90.000€ con cargo ao Plan E non tivo os resultados esperados se ben é certo que o aspecto interior do centro mellorou sensiblemente. Tamén se mellorou a pista exterior aínda que as obras realizadas distan bastante do que recolle o proxecto de execución.
Nestas datas estanse a colocar os dobres ventanais nas zonas máis batidas polo vento, encargándose a Consellería de Educación desta obra. Foi tamén a Consellería a que sufragou os gastos de renovar toda a instalación eléctrica do edificio vello no 1º trimestre do curso que remata.
As grietas foron tratadas no interior do edificio e queda pendente a zona exterior.
Outra das obras pendentes é o acondicionamento do parque infantil para adaptalo a normativa vixente. A finais de curso queremos entregar no Concello, que é o encargado do mantemento, un informe elaborado por un organismo autorizado no que consten as deficiencias que presenta e as obras a realizar para cumprir coa normativa.
No tema dos aparcamentos pouco podemos facer, só apelar ao sentido común e pedir que todos sexamos conscientes das limitacións que ten o Centro debidas á súa ubicación, somos unha illa e parte do seu limitado territorio foi ocupado por un campo de fútbol.
En canto á cuberta dende a parada dos buses, este curso fíxose unha beirarrúa coa idea de que sexa cuberta en canto haiba presuposto dispoñible por parte do Concello ou da Consellería.
4. COMEDOR
Este foi outro dos nosos centros de atención, hai tres cursos que se está demandando o incremento de persoal na cociña para poder atender a todos os usuarios que o soliciten. Como resultado das accións realizadas por toda a comunidade educativa no mes de fomos recibidos polo Secretario Xeral e o Director Xeral de Recursos Humanos. Alí tivemos oportunidade de explicar cal era a situación do comedor e cales eran as súas necesidades. A mediados deste trimestre o Sr. Secretario Xeral comunicou ao centro telefónicamente que se incrementaría o persoal de cociña para o curso 2010/2011. Esperamos que así sexa.
Os buses ao rematar de comer é máis complexo, o alumnado usuario que non ten bus procede de rutas diferentes e para cubrilas todas serían precisos moitos buses que terían unha ocupación mínima.
As nais colaboradoras xa saben “que non son as nais, pais, avós” dos nenos que comen no comedor aínda así actúan co mesmo cariño e coa mesma severidade que debería facelo unha nai, pai ou avó responsable, e todos os cursos se solicita persoal para cubrir estes postos así que os que estén interesados en ocupalo só teñen que cubrir o impreso que se proporciona en secretaría.
A petición de “máis lasaña no comedor” será tida en conta sempre que se manteña o equilibrio nos menús.
5. ACTIVIDADES EXTRAESCOLARES
Neste apartado as observacións son unánimes “máis excursións”. Cremos que se debe a que só se ten en conta as excursións sen contido didáctico e non se consideran todas as demáis actividades que son moitas. De todos os xeitos para curso 2010-2011 presentamos un Plan de Mellora que ten como obxectivo as actividades complementarias e extraescolares.
6. LIMPEZA
Todas as observacións inciden na hixiene dos baños. Estamos seguros de que non é un problema ocasionado pola falta de limpeza senon polo exceso de uso. Cando as limpadoras rematan o seu traballo os aseos quedan en perfecto estado de hixiene. Logo pasan 500 persoas ao longo de cinco horas ou máis sen que haiba persoal de limpeza ata o final do día.
Xa reclamamos en varias ocasións a presenza dunha persoa de limpeza durante a xornada lectiva pero ainda non se conseguiu ... seguiremos intentandoo.
7. RECREOS
Aquí faise referencia a un espazo de tempo, o que transcurre dende que chegan os buses ata o inicio das actividades lectivas, que non ten a consideración de recreo e polo tanto non está regulado como tal. É un tempo no que o alumnado permanece sen unha vixianza establecida. Isto non significa que non haiba no centro persoas para intervir no caso de xurdir algunha situación que o demande. É un tempo no que o alumnado ten que utilizar as aprendizaxes e os recursos adquiridos ao longo dos períodos lectivos e de recreo para resolver os problemas que poidan plantexarse sen a presenza directa dun adulto.
No resto dos recreos a vixianza é a establecida nos ROC vixentes. Hai que lembrar qu son tempos de xogo libre e de lecer nos que se debe potenciar ao máximo a autonomía do alumnado para resolver os conflictos que poidan xurdir.
8. CONSERXERÍA
Aquí remitímonos ao respostado o curso pasado. É imposible que unha única persoa sexa quen de desempeñar en todo momento as súas funcións sen algún fallo e máis tendo en conta que está a facer o traballo de máis de dúas persoas que son coas que debería contar o centro.
9. TRANSPORTE
Seguimos tendo observacións que aluden á puntualidade e as funcións das acompañantes queixándose de que son demasiado severas. En canto á primeira cada vez que temos noticias dalgunha incidencia contactamos coa empresa correspondente para subsanalas e á segunda é moi difícil atopar un equilibrio que satisfaga a todos os usuarios aínda que o seguiremos intentando.
10. SEGURIDADE
Este curso mantiveronse pechadas ao longo da xornada lectiva dúas das portas sempre que as obras que se realizaron o permitiron.
A terceira non é posible tela pechada dado que é o único punto polo que se pode acceder ao recinto e están entrando e saíndo vehículos con frecuencia ao longo de toda a xornada.
Pechala causaría máis inconvintes que tela aberta e máis tendo en conta que é unha zona na que non hai alumnado.
11. VARIOS
Aquí realizanse observacións que serán tidas en conta para o vindeiro curso incrementando as seccións bilingües, formando parte dos centros ABALAR e co plan de potenciación da lingua galega que elaborou o equipo de dinamización lingüística.
Grazas polo voso tempo e a vosa colaboración á hora de cubrir as enquisas de satisfacción. Os resultados das enquisas poden consultarse na páxina web do centro.
